قصیده فی حق الامام جعفر الصادق(ع)
عندي وصيّه للجعـفــريّـه
أحيوا أمـرْنه يشيعه يشيعه
أحيوا أمـرْنه يشيعه يشيعه
ــــــــــــــــــــــــــــــ
هذا جعفر الصّادق نسِمْعه ايْـوصّي و ايگول
يروي و الخـبـر عـن جـدّه عـنِّ اِلبـاري منقـول
كلمن بالحشر رايـد شفــاعـة فـاطمـه اِيْـنول
خل يبچي عَلىٰ جدنه اللي داست صدره لخْـيول
يـــوم القيـامه ايشوف الكرامه
ايعيش ابقصُرنه يشيعه يشيعه
أحيوا أمـرْنه يشيعه يشيعه
________
يا شيعه نعاهدكم و ابد ما نخلـف الدين
نحسب كلشي دين ابدين حتى دمعة العين
وين اللي يواسينه ابدَمِعْـتـه يا خلگ وين
و ايـفرّح گلبنا من نشوفه ابمجلس احسين
ابهاي المآسي وينه اليواسي
اِبْـدمعه يسرنه يشيعه يشيعه
أحيوا أمـرْنه يشيعه يشيعه
________
إحياء المجالس يالـمُحب يحيي الضماير
و الباري تعالىٰ ابمصحفه او قُـرآنه ذاكر
من تقوىٰ الـقُـلوب اللـي يعظّـم هالشعائر
و آنا ابنفسي أضمنله يطب الجنه باچر
نِشكر سَعِـيكم نلزم بديكم
بيكم فخرنه يشيعه يشيعه
أحيوا أمـرْنه يشيعه يشيعه
_________
يا من معتني المجلس تمهّـل حيـن ممشاك
فِـرْشَـت أجْـنِـحَـتها حدِر رجلك كل الأملاك
و ابن العسكري ابّبـاب الحُسينيّه إيتلگّـاك
ينده ياللي جاي اتواسي جدّي احسين حيّاك
ابهاي المجالس مهـديـنه جالس
او ويَّا حضرنه يشيعه يشيعه
أحيوا أمـرْنه يشيعه يشيعه
_________
إلكم بالقيامه من ثواب ايفوق اِلحْصاء
والله ايضاعف ابأجره الجميل إلكم كما شاء
بالمجلس إذا ناديتوا لبَّيك يَــزَهراء
تتحوّل صدى الصرخات شوكه ابعين الأعداء
ظلّوا ابعزمكم لحّد يهمكم
أنتو ابنظرنه يشيعه يشيعه
أحيوا أمـرْنه يشيعه يشيعه
_________
يا من تِحْضِرُون ابمجلس احسين او تنوحون
أمنا فاطمه اويّاكم تِـوِن لـمّـن تونّون
بيديها تجي او تجمع دمعكم حين تبچون
و اليجري دَمِعْـته أجره عند الزهره مضمون
العاش ابمصابه انسهّـل حسابه
نعطيه اجرنه يشيعه يشيعه
أحيوا أمـرْنه يشيعه يشيعه
ــــــــــــــــــــــــــــــــ
الميرزا عادل أشكناني
[ بازدید : 37 ] [ امتیاز : 3 ] [ نظر شما : ]